«Арғымақ» ат-спорттық сауықтыру кешенінің ұжымы Есіл өзені бойында өткен «Бұрқасын-2026» қысқы фестиваліне қатысып, мерекелік атмосфераны тамашалады.

Биыл 25-ші рет ұйымдастырылған фестивальге 2000-нан астам адам жиналды. Шара Милан-2026 қысқы Олимпиадасы қатысушыларын қолдау мақсатында және «Заң және тәртіп» акциясы аясында өтті.

2000 жылдан бері дәстүрлі түрде өткізіліп келе жатқан «Бұрқасын» алғашында спорттың 5 түрін ғана қамтыса, бүгінде олардың саны 13-ке жетті. Қатысушылар шаңғы жарысы, гір спорты, армрестлинг, валенкимен хоккей, белбеу күресі, мотокросс, автоспорт, арқан тарту, қысқы мини-футбол, қар лақтыру, қысқы волейбол, мас-рестлинг және тюбинг бойынша бақ сынады.

Фестиваль қонақтарға көтеріңкі көңіл күй сыйлап, салауатты өмір салтын насихаттауға тағы бір мүмкіндік берді.